2
1 / New Testament / 1 Peter / 2 3

1 አሰስለዋ ፡ እንከ ፡ እምኔክሙ ፡ ለኵለ ፡ እከይ ፡ ወለኵሉ ፡ ሕብል ፡ ወለናፍቆ ፡ ወለተሐምዮ ፡ ወለተቃንኦ ።

2 ወኩኑ ፡ ከመ ፡ እለ ፡ ይእዜ ፡ ተወልዱ ፡ ሕፃናት ፡ ወአፍቅሩ ፡ ሐሊበ ፡ ነባቤ ፡ ዘአልቦቱ ፡ ቱስሕት ፡ ከመ ፡ ቦቱ ፡ ትልሀቁ ፡ ለድኂን ።

3 ወናሁ ፡ ጥዕምክሙ ፡ ከመ ፡ ኄር ፡ እግዚአብሔር ፡ ወኀቤሁ ፡ ምግባኢክሙ ።

4 ወይእቲ ፡ እብን ፡ እንተ ፡ በኀበ ፡ ሰብእ ፡ ምንንት ፡ ወበኀበ ፡ እግዚአብሔርሰ ፡ ኅሪት ፡ ወክብርት ።

5 ወአንትሙኒ ፡ ጽንዑ ፡ ከመ ፡ እብን ፡ መንፈሳዊ ፡ ወኩኑ ፡ ታቦተ ፡ መንፈሳዌ ፡ ለክህነት ፡ ቅድስት ፡ ወንጽሕት ፡ ከመ ፡ ታቅርቡ ፡ ወታዕርጉ ፡ መሥዋዕተ ፡ መንፈሳዌ ፡ ዘይሰጠወክሙ ፡ እግዚአብሔር ፡ በእደዊሁ ፡ ኢየሱስ ፡ ክርስቶእስ ።

6 እስመ ፡ ከመዝ ፡ ጽሑፍ ፡ ናሁ ፡ እሠይም ፡ ውስተ ፡ ጽዮን ፡ እብን ፡ ማዕዘንት ፡ ኅሪት ፡ ወክብርት ። ወዘአምነ ፡ ባቲ ፡ ኢይትኀፈር ።

7 ለክሙ ፡ ውእቱ ፡ ክብር ፡ ለእለ ፡ ተአምኑ ፡ ወለእለሰ ፡ ይክሕዱ ፡ እብን ፡ እንተ ፡ መኒንዋ ፡ ነደቅት ፡ ወይእቲ ፡ ኮነት ፡ ውስተ ፡ ርእሰ ፡ ማዕዘንት ።

8 ውእቱኬ ፡ እብነ ፡ ዕቅፍት ፡ ወእብነ ፡ ካሕድ ፡ ለእለ ፡ ይትዓቀፉ ፡ በቃሉ ፡ ወይክሕድዎ ፡ ለዘቦቱ ፡ ተፈጥሩ ።

9 ወአንትሙሰ ፡ ፍጥረት ፡ ኅሩያን ፡ ወታቦት ፡ ለንጉሥ ፡ ወሕዝብ ፡ ንጹሕ ፡ ወሕዝብ ፡ ዘይትሜካሕ ፡ ከመ ፡ ትንግሩ ፡ ሠናይቶ ፡ ለዘጸውዐክሙ ፡ እምጽልመት ፡ ውስተ ፡ ብርሃነ ፡ ስብሐቲሁ ።

10 እንዘ ፡ ቀዲሙ ፡ ኢኮንክሙ ፡ ሕዝቦ ። ይእዜሰ ፡ ሕዝበ ፡ እግዚአብሔር ፡ አንትሙ ። እንዘ ፡ ቀዲሙ ፡ ኢኮነክሙ ፡ ምሑራነ ። ይእዜሰ ፡ መሐረክሙ ።

11 አኀውየ ፡ ፍቁራን ፡ እስእለክሙ ፡ ብቍዑኒ ፡ ከመ ፡ ፈላሲ ፡ ወከመ ፡ ድኩም ፡ ታርሕቅዋ ፡ ለፍትወተ ፡ ሥጋክሙ ፡ እንተ ፡ ትፀብኣ ፡ ለነፍስክሙ ።

12 ወግዕዝክሙኒ ፡ በማእከለ ፡ አሕዛብ ፡ ሠናየ ፡ ለይኩን ። ከመ ፡ ኢይርከቡ ፡ በዘየሐምዩክሙ ፡ ከመ ፡ ገባሬ ፡ እኪት ፡ ወሠናየ ፡ ምግባሪክሙ ፡ ይርአዩ ፡ ወይሰብሕዎ ፡ ለእግዚአብሔር ፡ ከመ ፡ ይትመየጦሙ ።

13 አትሕቱ ፡ ርእሰክሙ ፡ ለኵሉ ፡ ፍጥረተ ፡ እጓለ ፡ እመሕያው ፡ በእንተ ፡ እግዚአብሔር ፡ ወለንጉሥኒ ፡ እስመ ፡ ኵሉ ፡ ሎቱ ።

14 ወለመኳንንትኒ ፡ እስመ ፡ ውእቱ ፡ ይፌንዎሙ ፡ ከመ ፡ ይኰንንዎሙ ፡ ለእለ ፡ ይገብርዋ ፡ ለእኪት ፡ ወያአኵትዎሙ ፡ ለእለ ፡ ይገብርዋ ፡ ለሠናይት ።

15 እስመ ፡ ከመዝ ፡ ውእቱ ፡ ፈቃዱ ፡ ለእግዚአብሔር ፡ ከመ ፡ በሠናይ ፡ ምግባሪክሙ ፡ ትእሥሩ ፡ አፉሆሙ ፡ ለአብዳን ፡ ሰብእ ፡ እለ ፡ ኢያአምርዎ ፡ ለእግዚአብሔር ።

16 ወኩኑ ፡ ከመ ፡ አግዓዝያን ፡ ወአኮ ፡ ከመ ፡ እለ ፡ ቦሙ ፡ ጌጋይ ፡ ዘእኩይ ። ወአንትሙሰ ፡ ከመ ፡ አግብርተ ፡ እግዚአብሔር ።

17 ኵሎ ፡ አክብሩ ፡ ወቢጸክሙኒ ፡ አፍቅሩ ። ወለእግዚአብሔርኒ ፡ ፍርህዎ ፡ ወለንጉሥኒ ፡ አክብርዎ ።

18 ወአንትሙኒ ፡ ነባሪ ፡ ተኰነኑ ፡ ለአጋእዝቲክሙ ፡ እንዘ ፡ ትፈርሁ ፡ ወአኮ ፡ ዳእሙ ፡ ለኄራን ፡ ወለመሓርያን ፡ አላ ፡ ለእኩያንኒ ።

19 እስመ ፡ ጸጋ ፡ እግዚአብሔር ፡ ትትወሀብ ፡ ለዘበእንተ ፡ ሠናይ ፡ ምግባሩ ፡ ይትዔገሣ ፡ ለሐዘን ፡ እንዘ ፡ የሐምም ፡ በግፍዕ ።

20 ወምንትኑመ ፡ ይእቲ ፡ አኰቴትክሙ ፡ እመ ፡ እንዘ ፡ ትኤብሱ ፡ ትትዔገሡ ፡ መቅሠፍተክሙ ። አላ ፡ እንዘ ፡ ሠናየ ፡ ትገብሩ ፡ እመ ፡ ተዐገሥክሙ ፡ ግፍዐክሙ ፡ ዛቲ ፡ አኰቴት ፡ ይእቲ ፡ በኀበ ፡ እግዚአብሔር ።

21 ወበአንተ ፡ ዝንቱ ፡ ተጸዋዕክሙ ፡ እስመ ፡ ክርስቶስኒ ፡ በእንቲአክሙ ፡ ሐመ ፡ ይኅድግ ፡ ለክሙ ፡ ማዕተቦ ፡ ከመ ፡ ትትልዉ ፡ አሰረ ፡ ዚአሁ ።

22 በከመ ፡ ውእቱ ፡ ኢገብረ ፡ ኃጢአተ ፡ ወኢተረክበ ፡ ሐሰት ፡ ውስተ ፡ አፉሁ ።

23 እንዘ ፡ ይጼእልዎ ፡ ኢጸአለ ፡ ወእንዘ ፡ ያሐምምዎ ፡ ኢተቀየመ ። አላ ፡ አግብአ ፡ ለዘይኴንን ፡ ጽድቀ ።

24 ወበእንተ ፡ ኃጣውኢነ ፡ ውእቱ ፡ ተሰቅለ ፡ ዲበ ፡ ዕፅ ፡ በሥጋሁ ፡ ከመ ፡ ያውፅአነ ፡ እምኃጣውኢኒ ፡ ወበጽድቁ ፡ ያሕይወነ ። እስመ ፡ በቍስለ ፡ ዚአሁ ፡ ሐየውክሙ ፡ ቍስለክሙ ፡ እንዘ ፡ ከመ ፡ አባግዕ ፡ ትሳኰዩ ።

25 ወይእዜኒ ፡ ግብኡ ፡ ኀበ ፡ ኖላዊክሙ ፡ ወዐቃቢሃ ፡ ለነፍስክሙ ።