3
2 / New Testament / 1 Peter / 3 4

1 ወከማሁ ፡ አንትንሂ ፡ አንስት ፡ ተኰነና ፡ ለአምታቲክን ፡ ከመ ፡ እመቦ ፡ ዘኢየአምን ፡ በዝነቱ ፡ ነገር ፡ እምሥነ ፡ ምግባሪሆን ፡ ለአንስት ፡ ይርአዩ ፡ ወዘእንበለ ፡ ካሕድ ፡ ይርብሕዋ ፡ ለነፍሶሙ ።

2 ወእንዘ ፡ ትፈርሃ ፡ አሠንያ ፡ ግዕዘክን ፡ በንጽሕ ።

3 አኮ ፡ ከመ ፡ ታድልዋ ፡ ለዐይነ ፡ ሰብእ ፡ በተጸፍሮ ፡ ሥዕርትክን ፡ ወአኮ ፡ በተሰርግዎ ፡ ወርቅ ፡ ወብሩር ፡ ወአኮ ፡ በተለብሶ ፡ አልባስ ፡ ዘብዙኅ ፡ ሤጡ ።

4 አላ ፡ በኅቡእ ፡ ልቡ ፡ ለሰብእ ፡ ለዘኢይጠፍእ ፡ ወለዘኢይደምፅ ፡ ምንፈስ ፡ ቅዱስ ፡ ዘህልው ፡ ቅድመ ፡ እግዚአብሔር ፡ ዘብዙኅ ፡ ሐሳቡ ።

5 ወከማሁ ፡ ትካትኒ ፡ ቅዱሳት ፡ አንስት ፡ እለ ፡ ይትዌከላ ፡ ላዕለ ፡ እግዚአብሔር ፡ ይሰረገዋ ፡ ርእሶን ፡ በተኰንኖ ፡ ለአምታቲሆን ።

6 ከመ ፡ ሣራ ፡ ትትኤዘዞ ፡ ለአብርሃም ፡ ወእግዚእየ ፡ ትብሎ ፡ ወአንትንሂ ፡ አዋልዲሃ ፡ ኩና ፡ በምግባረ ፡ ሠናይ ፡ እንዘ ፡ ኢትፈርሃ ፡ እምነ ፡ ድንጋፄ ፡ ወኢምንተኒ ።

7 ወከማሁ ፡ አንትሙሂ ፡ ዕደው ፡ እንዘ ፡ ትነብሩ ፡ ምስለ ፡ አንስቲያክሙ ፡ ኢታስተሐቅሩ ፡ አንስቲያክሙ ፡ እስመ ፡ ይደክም ፡ ፍጥረተ ፡ ዚአሆን ፡ አክብሩ ፡ አንስቲያክሙ ፡ እስመ ፡ ይወርሳ ፡ እማንቱኒ ፡ ክብረ ፡ ወሕይወተ ፡ ምስሌክሙ ፡ ከመ ፡ ኢትትዐቀፍ ፡ ጸሎትክሙ ።

8 ወማኅለቅቱሰ ፡ ለኵሉ ፡ ከመ ፡ ተዐርዩ ፡ ልበ ፡ በአሐዱ ፡ ሕሊና ፡ እንዘ ፡ ተሐምሙ ፡ ሕማመ ፡ ቢጽክሙ ።

9 ወእንዘ ፡ ኢተዐብዩ ፡ ልበክሙ ፡ ወእንዘ ፡ ኢትፈድይዎ ፡ እኪተ ፡ ለዘገብረ ፡ ለክሙ ፡ እኪተ ፡ ወእንዘ ፡ ኢትጼእልዎ ፡ ለዘጸአለክሙ ። ወለጸላኢክሙኒ ፡ ባርክዎ ፡ እስመ ፡ ለዝንቱ ፡ ተጸዋዕክሙ ፡ ከመ ፡ በረከተ ፡ ትረሱ ።

10 ወዘሰ ፡ ያፈቅራ ፡ ለሕይወት ፡ ወይፈቱ ፡ ይርአይ ፡ መዋዕለ ፡ ሠናያተ ፡ ያርምም ፡ ልሳኖ ፡ እምእኪት ፡ ወከናፍሪሁኒ ፡ ከመ ፡ ኢይንብባ ፡ ሐሰተ ።

11 ይትገሐሥ ፡ እምእኪት ፡ ወይግበራ ፡ ለሠናይት ። ለይኅሥሣ ፡ ለሰላም ፡ ወይትልዋ ።

12 እስመ ፡ አዕይንቲሁ ፡ ለእግዚአብሔር ፡ ኀበ ፡ ጻድቃኑ ፡ ወእዝኑሂ ፡ ኀበ ፡ ስእለቶሙ ። ገጹ ፡ ለእግዚአብሔር ፡ ኀበ ፡ እለ ፡ ይገብሩ ፡ እኪተ ።

13 ወመኑ ፡ ውእቱ ፡ ዘእኪተ ፡ ይፈቅድ ፡ ለክሙ ፡ እመ ፡ ትቀንኡ ፡ ለገቢረ ፡ ሠናይ ።

14 ወእመሰ ፡ በገቢረ ፡ ጽድቅ ፡ ተሐምሙ ፡ ብፁዓን ፡ አንትሙ ፡ ወዘሰ ፡ ይጌርመክሙ ፡ ኢትፍርሁ ፡ ወኢትደንግፁ ።

15 አላ ፡ ለእግዚአብሔር ፡ ቀድስዎ ፡ በኵሉ ፡ ልብክሙ ፡ ወድልዋኒክሙ ፡ ሀልዉ ፡ በኵሉ ፡ ጊዜ ፡ ከመ ፡ ታውሥእዎሙ ፡ ቃለ ፡ ለእለ ፡ ይሴአሉክሙ ፡ በእንተ ፡ ዛቲ ፡ ተስፋክሙ ።

16 ወበየውሀትክሙ ፡ ወበፍርሀተ ፡ እግዚአብሔር ፡ አሠንዩ ፡ ግዕዘክሙ ፡ ከመ ፡ እመቦ ፡ እለ ፡ ይሔምዩክሙ ፡ ከመ ፡ ዘእኩይ ፡ ምግባሪክሙ ፡ ይትኀፈሩ ፡ እለ ፡ ይሔምዩክሙ ፡ እምሥነ ፡ ምግባሪክሙ ፡ ዘበእንተ ፡ ክርስቶስ ።

17 እስመ ፡ ይኄይስ ፡ እንዘ ፡ ሠናየ ፡ ትገብሩ ፡ ወትፈቅዱ ፡ ፈቃዶ ፡ ለእግዚአብሔር ፡ ትሕምሙ ፡ እምነ ፡ እንዘ ፡ እኪተ ፡ ትገብሩ ።

18 እስመ ፡ ክርስቶስኒ ፡ ምዕረ ፡ ሞተ ፡ በእንተ ፡ ኃጣውአ ፡ ሰብእ ። ወበእንቲአነ ፡ ሞተ ፡ ጻድቅ ፡ በእንተ ፡ ኃጣውኢነ ፡ ከመ ፡ ኪያነ ፡ ያብጽሐነ ፡ ኀበ ፡ እግዘአብሔር ። ሞተ ፡ በሥጋ ፡ ወሐይወ ፡ በመንፈስ ።

19 ወሖረ ፡ ኀበ ፡ እለ ፡ ሙቁሕታ ፡ ትነብር ፡ ነፍሶሙ ፡ ወሰበከ ፡ ሎሙ ።

20 ለእለ ፡ ክሕድዎ ፡ ቀዲሙ ፡ ወጸንሐቶሙ ፡ ትዕግሥቱ ፡ ለእግዚአብሔር ፡ በመዋዕሊሁ ፡ ለኖኅ ፡ አመ ፡ ይገብር ፡ ታቦተ ፡ ወድኅኑ ፡ ባቲ ፡ ሰማኒቱ ፡ ነፍስ ፡ ኅዳጣን ፡ እምነ ፡ ማይ ።

21 ወኪያነኒ ፡ ይእዜ ፡ ያድኅነነ ፡ በአርአያሁ ፡ በጥምቀት ። አኮ ፡ በኅፅበተ ፡ ሥጋ ፡ እምርስሐት ፡ አላ ፡ ከመ ፡ ግዕዘ ፡ ሠናየ ፡ ይምሀረነ ፡ በዘነአምን ፡ በእግዚአብሔር ፡ በተንሥኦቱ ፡ ለኢየሱስ ፡ ክርስቶስ ።

22 ዘሀለወ ፡ ይነብር ፡ በየማነ ፡ እግዚአብሔር ፡ ዘዐርገ ፡ ውስተ ፡ ሰማይ ፡ ወተኰነኑ ፡ ሎቱ ፡ መላእክት ፡ ወሥልጣናት ፡ ወኵሎ ፡ ኃይል ።