4
3 / New Testament / 1 Peter / 4 5

1 ወእመሰ ፡ ክርስቶስ ፡ ተሰቅለ ፡ በሥጋሁ ፡ በእንቲአነ ፡ ወአንትሙኒ ፡ ተወልተዉ ፡ በይእቲ ፡ ሕሊና ፡ እስመ ፡ ዘሐመ ፡ በሥጋሁ ፡ ድኅነ ፡ እምኃጣውኡ ።

2 ከመ ፡ ኢይሕየው ፡ እንከ ፡ በፍትወተ ፡ እጓለ ፡ እመሕያው ፡ አላ ፡ በፈቃዱ ፡ ለእግዚአብሔር ፡ ይፈጽም ፡ ትረፈ ፡ ሕይወቱ ፡ በሥጋሁ ።

3 እስመ ፡ የአክለክሙ ፡ ዘኀለፈ ፡ መዋዕል ፡ ዘገበርክሙ ፡ ቦቱ ፡ ፈቃዶሙ ፡ ለአሕዛብ ። ዝሙተ ፡ ወፍትወተ ፡ ወስክረተ ፡ ወስጥየተ ፡ ወስታየ ፡ ዘእንበለ ፡ ግዕዝ ፡ ወአፍቅሮ ፡ አማልክት ።

4 ዑቁ ፡ እንከ ፡ ውስተ ፡ ዝንቱ ፡ ምግባር ፡ ኢትሩጹ ፡ ነኪራነ ፡ ኩኑ ፡ እምኔሃ ፡ ለይእቲ ፡ ፍኖት ፡ ወእምነ ፡ ውእቱ ፡ ምግባር ፡ ዘአልቦ ፡ ዐቅም ። ወናሁ ፡ ሰብእ ፡ እምኔሆሙ ፡ ያነክሩ ፡ በእንቲአክሙ ፡ ወይፀርፉ ፡ ላዕሌክሙ ፡ ሶበ ፡ ይሬእዩክሙ ፡ ዘኢትሳተፍዎሙ ፡ ውስተ ፡ ውእቱ ፡ ምግባር ፡ ዘትካት ።

5 እሉኬ ፡ እለ ፡ ሀለዎሙ ፡ ያግብኡ ፡ ሐሳበ ፡ ለዘሀለወ ፡ ድልወ ፡ ይኰንኖሙ ፡ ለሐያዋነ ፡ ወለምውታን ።

6 ወበእንተ ፡ ዝንቱ ፡ ዜነውዎሙ ፡ ለምውታን ፡ ከመ ፡ ይትኰነኑ ፡ በሥጋሆሙ ፡ በሕገ ፡ እጓለ ፡ እመሕያው ፡ ወይሕየዉ ፡ በመንፈሶሙ ፡ በሕገ ፡ እግዚአብሔር ።

7 እስመ ፡ ቀርበ ፡ ማኅለቅቱ ፡ ለኵሉ ፡ አንጽሑ ፡ ልበክሙ ፡ ወጸሐዉ ፡ ለጸሎት ።

8 ወእምኵሉሰ ፡ ዘይቀድም ፡ ተሩቀሩ ፡ በበይናቲክሙ ፡ በምልአ ፡ ልብክሙ ፡ እስመ ፡ ተፋቅሮ ፡ ይደመስሶን ፡ ለኵሎን ፡ ኃጣውእ ።

9 ወአፍቅሩ ፡ ነግደ ፡ እንዘ ፡ ኢታስተዓፅቡ ።

10 ወኵልክሙ ፡ በከመ ፡ ነሣእክሙ ፡ ፍቶ ፡ ለእግዚአብሔር ፡ በበይናታክሙ ፡ ተለአኩ ፡ ከመ ፡ ኄር ፡ ላእክ ። እስመ ፡ ለለአሐዱ ፡ ዘዘዚአሁ ፡ ዕሤቱ ፡ እምኀበ ፡ እግዚአብሔር ።

11 ወለእለሂ ፡ ትሜህሩ ፡ መሀሩ ፡ ቃሎ ፡ ለእግዚአብሔር ፡ ወዘኒ ፡ ይትለአክ ፡ ለይትለአክ ፡ በኀይለ ፡ እግዚአብሔር ፡ ዘወሀቦ ፡ ከመ ፡ በኵሉ ፡ ይሰባሕ ፡ እግዚአብሔር ፡ በኢየሱስ ፡ ክርስቶሰ ፡ ዘሎቱ ፡ ስብሐት ፡ ለዓለመ ፡ ዓለም ፡ አሜን ።

12 አኀዊነ ፡ ኢታንክርዋ ፡ ለእንተ ፡ ትመጽአክሙ ፡ መከራ ፡ ከመ ፡ ዘነኪር ፡ ግብር ፡ ዘይከውን ፡ ብክሙ ።

13 ዳእሙ ፡ ከመ ፡ ትሳተፍዎ ፡ በሕማሙ ፡ ለክርስቶስ ፡ ወተፈሥሑ ፡ ከመ ፡ አመ ፡ ያስተርኢ ፡ በስብሐቲሁ ፡ ትትሐሠዩ ፡ ፍሡሓኒክሙ ።

14 ወእመሰቦ ፡ ዘተዐየሩክሙ ፡ በእንተ ፡ ስሙ ፡ ለክርስቶስ ፡ ብፁዓን ፡ አንትሙ ፡ እስመ ፡ ስብሐቲሁ ፡ ወኀይሉ ፡ ለእግዚአብሔር ፡ ወመንፈሱ ፡ ያዕርፍ ፡ ላዕሌክሙ ።

15 አልቦ ፡ ዘየሐምም ፡ እምውስቴትክሙ ፡ አው ፡ ከመ ፡ ቀታሊ ፡ አው ፡ ከመ ፡ ሰራቂ ፡ አው ፡ ከመ ፡ ዘእኩይ ፡ ምግባሩ ፡ አው ፡ ከመ ፡ ዘባዕደ ፡ ያፈቅር ፡ ወይፈቱ ።

16 ወእመሰ ፡ ከመ ፡ ክርስቲይናዊ ፡ ኢትኅፈሩ ፡ አላ ፡ ሰብሕዎ ፡ ለእግዚአብሔር ፡ በዝንቱ ፡ ስም ።

17 እስመ ፡ በጽሐ ፡ ጊዜሁ ፡ ለፍዳ ፡ ዘያቀድም ፡ እምነ ፡ ቤቱ ፡ ለእግዚአብሔር ። ወእመሰ ፡ ኮነ ፡ እምኀቤነ ፡ አቅድሞቱ ፡ ምንተ ፡ እንከ ፡ ይከውን ፡ ደኃሪቶሙ ፡ ለእለ ፡ ይክሕድዎ ፡ ለወንጌሉ ፡ ለእግዚአብሔር ።

18 ወሶበ ፡ ጻድቅ ፡ እምዕፁብ ፡ ይድኅን ፡ ኃጥእ ፡ ወዐማፂ ፡ በአይቴ ፡ ያስትርኢ ፡ ሀለዎ ።

19 ወእለኒ ፡ የሐምሙ ፡ በእንተ ፡ ፈቃዱ ፡ ለእግዚአብሔር ፡ ለያማኅፅኑ ፡ ነፍሶሙ ፡ ኀበ ፡ ምእመን ፡ ፈጣሪ ፡ በገቢረ ፡ ሠናይ ።