5
4 / New Testament / 1 Peter / 5

1 ወለእለኒ ፡ ይትለሀቁ ፡ እምኔክሙ ፡ አስተበቍዖሙ ፡ አነ ፡ ልሂቅ ፡ ካልኦሙ ፡ ወሰማዕት ፡ በእንተ ፡ ሕማሙ ፡ ለክርስቶስ ፡ ዘሀላዎ ፡ ያስተርኢ ፡ በስብሐቲሁ ፡ ከመ ፡ ትኩኑ ፡ ሱታፎ ።

2 ረዐዩ ፡ ዘሀሎ ፡ ኀቤክሙ ፡ መርዔቶ ፡ ለእግዚአብሔር ፡ እንዘ ፡ ተዐቅብዎሙ ፡ ወኢትቅንይዎሙ ፡ በኵርህ ፡ አላ ፡ በጽድቅ ፡ በእንተ ፡ እግዚአብሔር ፡ እንዘ ፡ ኢትሬብሕዎሙ ፡ አላ ፡ በምልአ ፡ ልብክሙ ፡ ወበትፍሥሕት ።

3 እንዘ ፡ ኢትትኄየሉ ፡ ሕዝቦ ፡ አላ ፡ አርአያ ፡ ኩንዎሙ ፡ ለመርዔቱ ።

4 ከመ ፡ አመ ፡ ያስተርኢ ፡ እግዚአ ፡ ኖሎት ፡ ትንሥኡ ፡ አክሊለ ፡ ስብሐት ፡ ዘኢይጸመሂ ።

5 ወከማሁ ፡ አንትሙሂ ፡ ወራዙት ፡ ተኰነኑ ፡ ለእለ ፡ ይልህቁክሙ ፡ ወኵልክሙ ፡ ተመሀርዋ ፡ ለአትሕቶ ፡ ርእስክሙ ፡ እስመ ፡ እግዚአብሔር ፡ ያኀስሮሙ ፡ ለዕቡያን ፡ ወያከብሮሙ ፡ ለእለ ፡ ያቴሕቱ ፡ ርእሶሙ ።

6 አትሕቱ ፡ እንከ ፡ ርእስክሙ ፡ ታሕተ ፡ እዴሁ ፡ ለእግዚአብሔር ፡ ጽንዕት ፡ ከመ ፡ ያልዕልክሙ ፡ አመ ፡ ይሔውጸክሙ ።

7 ወኵሎ ፡ ሕሊናክሙ ፡ ግድፉ ፡ ላዕሌሁ ፡ እስመ ፡ ውእቱ ፡ ይሔሊ ፡ በእንቲአክሙ ።

8 ጥበቡ ፡ እንከ ፡ ወአጥብቡ ፡ ልበክሙ ፡ እስመ ፡ ጸላኢክሙ ፡ ጋኔን ፡ ይጥሕር ፡ ከመ ፡ አንበሳ ፡ ወየኀሥሥ ፡ ዘይውኅጥ ።

9 አጽንዑ ፡ ቀዊመ ፡ በሃይማኖትክሙ ፡ እንዘ ፡ ታአምሩ ፡ ከመ ፡ ሕማሙ ፡ ለዝ ፡ ዓለም ፡ ትረክቦሙ ፡ ለኵሎሙ ፡ አኀዊክሙ ፡ ወአጽንዕዋ ፡ ለተፋቅሮ ።

10 ወእግዚአብሔርሰ ፡ ዘበኵሉ ፡ ክብር ፡ ጸውዐክሙ ፡ ውስተ ፡ ዘለዓለም ፡ ስብሐቲሁ ፡ በኢየሱስ ፡ ክርስቶስ ፡ ወሕዳጠ ፡ ሐሚመክሙ ፡ ውእቱ ፡ ይፌጽም ፡ ለክሙ ፡ ወያጸንዐክሙ ፡ ወያሌብወክሙ ።

11 ውእቱ ፡ ዘሎቱ ፡ ስብሐት ፡ ወኀይለ ፡ ለዓለመ ፡ ዓለም ፡ አሜን ።

12 ምስለ ፡ ሰልዋኖስ ፡ እኁነ ፡ ምእመን ፡ በከመ ፡ ሐለይኩ ፡ ሕዳጠ ፡ ጸሐፍኩ ፡ ለክሙ ፡ እንዘ ፡ አስተበቍዐክሙ ፡ ወእከውን ፡ ስምዐ ፡ ከመ ፡ በአማን ፡ ስብሐቲሁ ፡ ለእግዚአብሔር ፡ ዛቲ ፡ እንተ ፡ ባቲ ፡ ትቀውሙ ።

13 ትኤምኀክሙ ፡ ቤተ ፡ ክርስቲያን ፡ ኅሪት ፡ እንተ ፡ ውስተ ፡ ባቢሎን ፡ ወማርቆስ ፡ ወልድየ ።

14 ተአምኁ ፡ በበይናቲክሙ ፡ በአምኃ ፡ ተፋቅሮ ፡ ወተሰናአዉ ፡ ኵልክሙ ፡ እለ ፡ በክርስቶስ ፡ ሀሎክሙ ። አሜን ።